حكايات من دفتر يوميات مستشفى الصحة النفسية

يوميات أطباء امتياز بمستشفى الصحة النفسية 

يقضي الطالب الذي تخرج من كلية الطب 12 شهر تدريب عملى أو ما يسمى سنة الامتياز، وتعتبر هذه الفترة جزء أساسي مكمل لدراسة الطب ولا يعتبر الطالب مؤهلاً لممارسة مهنة الطب إلا بعد اجتياز هذه الفترة بنجاح.

طبيب الامتياز يعمل ويقيم في المستشفى خلال تلك الفترة ، قبل حصوله على رخصة لمزاولة مهنة الطب، ويطلق عليه أيضا اسم مقيم.

ومما لا شك فيه أن الحياة العملية تختلف كثيرا عن ما درسه الطالب خلال سنواته الجامعية، لاسيما فى مجال الطب النفسى والصحة النفسية.

وفى هذا التحقيق سوف نستعرض ما قاله مجموعة واعدة من شباب الأطباء الجدد عن تجربتهم أثناء سنة الامتياز بمستشفيات الصحة النفسية وعلاج الإدمان.

المرض النفسى خطير

يقول (م.أ) بعد أول زياره فى المستشفى وتجربة من التجارب اللى عمرها ما تتنسى فى حياتى أبدًا ناس عايشه فى عالم تانى زى ما بيقولوا، عالمهم الخاص اللى مش عاوزين حد يشاركهم فيه ولا حد عارف هما بيحسوا ب إيه.

قد ايه الإحساس صعب لما تلاقى شاب فى ريعان شبابه وموجود في مستشفى نفسية ولما تلاقى راجل مُسن بعد كل العمر والخبرة اللى شافها فى حياته بردو متأقلمش مع الحياة.

الحمد لله على نعمة العقل ناس كتير مننا مش مقدره النعمه دى، لكن اللى اقدر اقوله اوعى تسيب نفسك للزعل أو انك تكتم جواك، فضفض لأى حد المهم انك متراكمش الزعل لأن هييجي عليك يوم وممكن تبقى في نفس مكانهم كده.

ولو حد طلب منك انك تسمعه اوعى تتردد لحظه انك تسمعه لأنك ممكن تكون طوق النجاة ليه ف متبخلش إنك تسمعه وتطبطب عليه وتراضيه اوعى تستهون بيه ولا باللى بيحس بيه.

المرض النفسى لا يقل أهميه مقارنة بالمرض الجسدي بل أكثر أهميه لأنك ممكن تبقى ف مكانه فى يوم من الأيام وتحتاج اللى يسمعك ومتلاقيهوش.

تخيل حتى نفسك مش ضامنها وممكن تتعرض فى يوم من الأيام لموقف زى ده ربنا يشفيهم ويلطف بيهم ويعفو عنهم ويعوضهم عن كل اللى شافوه فى حياتهم أو بيمروا بيه دلوقتى.

محتاجين دعم وطمأنة

يقول (أ.ى) طول عمرى أسمع عن المكان ده وكان نفسى أشوفه على الحقيقة وأدخله من جوه وأشوف حالة الناس اللى فيه وعايشين ازاى و زى ما بنسمع عنهم سواء من social media أو من ناس شغاله فيه أو من صحابنا و كدا.

بس من يوم ما تحدد ميعاد العملى بتاعى فيه وأنا قلقانه و بفكر ياترى اليوم هيبقى عامل ازاى ،حتى الدكتوره لما سألتنا انطباعكم إيه عن المكان على طول ومن غير تفكير قولتلها خايفه جدًا.

بس بصراحه لما دخلت المكان وشوفت الناس حسيت تدريجيًا ب الأمان وبدأت أتكلم معاهم وأتعامل عادى لحد ما نسيت خوفى تمامًا، بس حسيت بيهم أكتر، و ده تعبنى نفسيًا جدًا.

ربنا يشفيهم ويعافينا يارب، معظم الناس دى على قدر كبير جدا من التعليم والثقافة ومعظمهم قريبين جدًا من ربنا وعلى دراية كبيرة بالقرأن والسنة، مشكلتهم إنهم  حساسين وفضلوا يعدوا فى مواقف فى حياتهم لحد ما وصلوا للمرحلة اللى هم فيها دلوقتى.

ده غير وجود ناس غير أسوياء نفسيًا وحاقدين فى حياتهم، الناس دى مش محتاجه أدويه قد ماهم محتاجين دعم وطمأنة من الناس اللى حواليهم، الناس دى طيبة جدا جدا يعنى مينفعش نقول عليهم مجانين أو حتى مرضى نفسيين.

لأن الناس اللى كدا بجد هم الناس اللى عايشين حياتهم بره المستشفى دى ووصلوا أغلب الناس للمستشفى ووصموهم بهذه المسميات.

لولا الآخرون ما كنا هنا

يقول (س.أ) : حقيقي ده أكتر مكان مؤلم نفسيًا اللى بنسبالي اسمه عالم تاني باطيب ناس ف الكون وأطيب قلب، كمية حزن بيدخل قلبي وانا ف المكان ده غير طبيعيه ويمكن بمسك نفسي من العياط بس علشان مينفعش اعيط قدامهم.

أصعب ألم  بيكون الالم النفسي، اللى هو مش عارف عنده أي مش حاسس باللى بيعمله مش قادر يتحكم فى تفكيره وتصرفاته وكل  اللى بيحصلهم ده واللى بيوصلهم لكده انسان تاني زيه  فعلا الجملة دي اثرت فيه جدًا.

""لولا الاخرون ما كنا هنا"" حقيقي لولا الناس اللى معندهمش رحمه لولا الضغط النفسي اللي بيتعرضوله مكانوش هيكونه فى المكان ده ربنا يتولاهم برحمته ويشفيهم ويعفي عنهم ويفرح قلوبهم وربنا ما يكتبها على حد ياارب

اللهم  أغْسل قلوبنا من أوجاعها؛ وأرزقُنا من فيض كرمك سعادةً لا تنْقطع، وأشرح صدورنا ويسر أمورنا يارب العالمين واحفظنا من تقلب الأحوال وغير اقدارنا الي افضلها ياارب، الكلام ده مش منقول ده حاجة بسيطة من اللى فى قلبي للمكان ده

أحاسيس مختلفة

يقول (ح.س): أحاسيس مختلفة من الدهشة والاسئلة والطاقة للمساعدة بكل الطرق الحمد لله على نعمة الصحة وإننا مكملين رغم كل الظروف والصعوبات اللى بنشوفها فى حياتنا، المرض النفسى أخطر بكتير من المرض العضوى.

الصحة النفسية نعمة كبيرة

يقول (م.ع): من اللى شوفته النهارده من زيارة المستشفى وبشوفه كل مرة بروح هناك بتاكد اللي احنا في نعمه كبيره اوي و محتاجين إننا نحمد ربنا عليها كل يوم.

الوفاء بالوعد

يقول (أ.أ): المريض النفسى اللى الناس بتقول عليا مجنون احب اقولك انك غلطان؛ لان هما أطيب ناس ممكن تشوفها، بس خلى بالك فى التعامل معاهم علشان لو وعدت بحاجة لازم توفى بيها.

اعتقادات خاطئة

يقول (خ.ع): فرحة أول مريض دي متتقدرش بجد، فرحة إن الرهبة اللي بينك وبين إنسان الناس كلها شايفاه حد مينفعش نتعامل معاه. اغلبنا بيبقي مفكر إن المريض العقلي ده مخلوق كدا ومبيفهمش، دا حتي محروم من أبسط حقوقه، محروم من إنه يعبر عن نفسه لان لما بيعبر عن نفسه أقل كلمة بتتقال عليه دا مجنون. وبعضنا مفكر إن المريض العقلي  بقا كدا بسبب بعده عن ربنا أو لسبب شيطاني مجهول.

ارتقو يا جماعة المرض النفسي زيه زي المرض العضوي مالوش سبب معين، الحقيقة غير كدا خالص، الناس دي أبسط واجمل قلب ممكن تتعامل معاه.

متدورش على لبسه وشكله حاول تتكلم معاه كويس وما تحسسه انه قليل، وسيبه يحكي لك قصة حياته ساعتها هتعرف هو ازاي بقا كدا وتحمد ربنا الف مرة علي اللي انت فيه، الحمد لله على كل حال.

التربية والإختيار الصح أساس المشكلة

يقول (أ.ب): نقدر نقول إن معظم المدمنين دخلو السكه دي بسبب أهاليهم، و بالاخص ابهاتهم، العنف الأسري، العقاب الشديد، الاهانة بشكل دائم، الاحباط الفظيع، و الصراع الأزلي لإثبات النفس ادام اهله واصحابه.

التربية الصالحة أساس أي مجتمع ناجح اختيار الزوج اللي يصلح يكون اب لعيالك و تشوفي فيه ابنك المستقبلي من أهم القرارات الي ممكن تاخديها في حياتك.

لم يتحملوا الكذب

يقول (أ.م): كل واحد هنا من أولياء الله، دول مستحملوش الكدب اللى برة عشان كدة جم هنا، كلمة من أحد المرضي سبحان الله خذ الحكمة من افواه العقلاء اللى هم المجانين! ربنا يشفيهم ويشفينا.

ربع الحقيقة

يقول (ر.ع): انك تتفرج على مرضى نفسيين و مرضى الإدمان و تسمع عنهم حاجه و لما تخش تشوفهم على الحقيقه حاجه تانيه خالص، المرض النفسي أصعب بكتير من المرض العضوى.

واللى بتقدمه المسلسلات من أحداث جوه المستشفيات ده ربع الحقيقه اللى بجد، ربنا يرحمهم أو يشفيهم  حاجة صعبة بجد.

عدم القدرة على التأقلم

يقول (م.ع): أنا مبعرفش اعبر عن اللى جوايا بالكتابه، بس التجربه دى خلتنى أحمد ربنا واشكره على كل النعم اللى أنا فيها. الناس كلها بتتعرض لمشاكل وصدمات في الحياة.

بس الناس اللى هنا معرفتش تتأقلم مع الصدمات دى ومخها مكنش قادر انه يستوعبها فكان نتيجتها إنه يبقى هنا، فالحمد لله على جميع النعم.

كنت مريض وبقيت دكتور

يقول (ن.ع): باقول للمريض أنا مقيم في المستشفى انا كمان، قاللي يعني كنت مريض و بقيت دكتور !!!  إني انفجر ضحكا ... عرفت منين يا ابن اللذينا.

خاتمة

عزيزى القارئ نتمنى أن تكون قد اكتسبت بعض النصائح من هذه الرسائل السريعة لهذه المجموعة من الأطباء والذين تحدثوا بتلقائية وصدق شديد عن هذه التجارب فى بداية مشوار حياتهم المهنى فى هذا المجال الإنساني الصعب.

فى النهاية لن نغلق دفتر اليوميات على أمل أن تشاركونا بنصائحكم وتجاربكم المشابهة لما عرضناه فى هذا التحقيق، دمت بخير مع ارق تمنياتنا للجميع بصحة نفسية دائمة.